Яӊалыклар

Пассажир йөртү белән шөгыльләнүче шәхси эшмәкәрләр һәм оешмаларга карата закон катгыйлана

Пассажир йөртү белән шөгыльләнүче шәхси эшмәкәрләр һәм оешмаларга карата закон катгыйлана. Яңа карар 21 нче июльдән үз көченә керәчәк. Аның нигезендә юлларда хакимият белән килешүе булмаган автобус һәм газель хуҗаларына штраф яный. Шәхси эшмәкәрләр өчен аның күләме 20 меңнән алып 30 мең сумга кадәр. Юридик затларга — 50 меңнән алып 60 мең сумга кадәр. Административ җаваплылык маршрутын үз ирке белән үзгәрткән транспортларны да урап узмаячак. Тагын бер яңалык Социаль юл йөрү билетлары булган гражданнарга кагыла. Аларны утыртмаган өчен, транспорт йөртүчеләр административ җаваплылыкка тартылачак.

37нче комплексында төзелүче балалар бакчасы сентябрь аенда эшли башлый

Шәһәрнең 37 нче комплексында төзелүче яңа балалар бакчасын сентябрь аенда файдалануга тапшыру карала. Бинаны төзү өчен республика һәм федераль бюджеттан 148 миллион сум акча бүленде. Биредә балалар өчен яхшы җиһазландырылган бүлмәләр, бассейн, спорт залы булачак. Ул 270 балага исәпләнгән.

Өзлексез педагогик белем бирү институты бинасы сентябрьдән яңадан балалар бакчасы карамагына тапшырыла

ГЭС бистәсендә урнашкан Өзлексез педагогик белем бирү институты бинасы сентябрьдән яңадан балалар бакчасы карамагына тапшырыла. Бирегә юлламаларны күбесенчә бюджет өлкәсендә эшләүчеләрнең балаларына бирү каралган. Моннан тыш та элеккеге балалар бакчасы биналарын яңадан кайтару буенча эш алып барылачак. Шулай ук яңа уку елыннан мәктәпләрдә әзерлек сыйныфлары оештыру программасы буенча эш дәвам иттереләчәк.

Чаллылылар 48/05 йортындагы шартлаудан зыян күрүчеләргә ярдәм итүләрен дәвам итә

Чаллылылар 48/05 йортындагы шартлаудан зыян күрүчеләргә ярдәм итүләрен дәвам итә. Биредә төзекләндерү эшләре тәмамланды. Хәзер бу фатирларда яшәүчеләр мебель, көнкєреш техникасы, йорт кирәк - яракларына мохтаҗ. Наталья Минлебаеваның фатиры да шартлаудан зыян күрде. Фатирындагы бер нәрсә дә исән калмады. Бүген Бердәм Россия партиясе вәкилләре аңа суыткыч бүләк итте. Хезмәттәшләре дә ярдәм кулы сузалар. Наталья Минлебаева эшләгән балалар бакчасы коллективы һәм башка мәктәпкәчә белем учреждениеләре 20 мең сум күләмендә акча җыеп бирде. Моннан тыш республика бюджетыннан да матди ярдәм булачак.

Кытай делигациясы Чаллыда

Шәһәргә эшлекле визит белән Кытай халык республикасының Ляочен шәһәреннән делегация килде. Чит ил кунаклары шәһәр тарих музеенда булып, автошәһәрнең үткәне белән танышты. Соңрак делегация “Татарстан” бизнес—отелендә шәһәр башкарма комитет җитәкчәсе Васил Шәйхразиев белән очрашты. Васил Шәйхразиев кунакларга шәһәрнең социаль—икътисадый тормышы һәм инвестицион проектлар өчен өстенлекле яклары турында сөйләде. Ляочен шәһәре вәкилләрен салым түләү системасы, эшмәкәрлек өчен мөмкинлекләр кызыксындырды. “Чаллы — перспективлы шәһәр һәм ике шәһәр арасында дуслык мөнәсәбәтләрен ныгыту өчен без барысын да эшләргә әзер,” — дип ассызыклады кытай халык республикасының финанаслар бюросы директоры Цзян Чжичжоу. Бүген делегация “КАМАЗ” ачык акционерлык җәмгыятендә булды, соңыннан сәүдә сәнәгать палатасында Чаллы эшмәкәрләре белән белән очрашу үтте.

«Хәят» спектакле DVD дискаларда чыкты!

Драматург Равил Сабыр пьессасы буенча эшләнгән “Хәят” спектаклен тамашачылар хәзер өйләрендә дә карый алачак. Мелодрама рус һәм татар телләрендә DVD дискаларда дөнья күрде. Бу Чаллы татар дәүләт драма театрының дискта чыгарылган беренче спектакле. Халык тарафыннан яратып кабул ителгән әлеге спектаклне театр артистлары инде өч ел дәвамында даими төстә сәхнәгә куеп килде.

Тулырак...

Өйләнешү көнен интернет аша билгелибез!

Бүгеннән Чаллының яшь парлары Тантаналар сараенда өйләнешү көнен интернет аша билгели ала. Теркәү вакытын ЗАГС идарәсе сайтында иртәнге 8дән 10га кадәр сайларга була. Аннары анкета тутырып, сәгать 12дән дә соңга калмыйча Тантаналар сараена килеп раслатырга кирәк. Бүген гаризалар 21нче августка кабул ителә.

“Заря” бакчачылык ширкатендә 39 яшьлек ир—ат кулга алынды

Шушы көннәрдә хокук саклау органнары хезмәткәрләре “Заря” бакчачылык ширкатендә 39 яшьлек ир—атны кулга ала. Аны тыелган үсемлекләрне законсыз үстерүдә гаеплиләр. Ул күршедәге ташландык бакчада киндер үстергән. Аңа каршы җинаять эше кузгатылды.

Login